Шараға жиналған қауым «Шеберлер қалашығы» жобасында декоративті - қолданбалы өнер бұйымдарының көрмесін тамашалады. Бұйымдар шеберханасы қайырымдылық мақсатында жұмыс істеді. Оқушыларымыздың жасаған ұлттық нақыштағы шығармашылық шеберлік сыныптарына тыңдаушыларымыз өз ризашылықтарын көрсетіп, таңданыстарын жасырмады.
Тәрбие үдерісін ұйымдастырудағы негізгі құралдардың бірі, патриоттық тәрбие берудің көзіне айналған - «Екі апта ауылда», «Ата-ананың жұмыс орнындағы 10 күн» әлеуметтік жобалары аясында жаз айларында ата-аналарының жұмыс орнына барып, өзіндік тәжірибе жасаған оқушылардың жұмыстары қойылды.
«2 апта ауылда» әлеуметтік тәжірибесі балаларды ауылдық жерлерді зерттеу, ауыл мәдениетімен танысу, ауыл тарихы мен тіршілігіне деген құрметті арттыруға бағытталған. Ал «Ата-ананың жұмыс орнындағы 10 күн» тәжірибесінің мақсаты - мамандық таңдауда оқушы мен ата-ана арасында өзара сыйластықты, қарым-қатынасты орнату.
Бал жинап, балдың түрлерін ажыратып үйренген, тігін цехында іс тігуді үйренген, қазақтың белгісіз болып келген асы- «жаубүйректі» жасау технологиясын меңгерген, ауыл өміріне қанығу арқылы ауыл мәселелерін шешуге бағытталған оқушылардың зерттеу жұмыстары, флористика, медицина, синоптикалық метеоқызмет, «Атамекен» кәсіпкерлер палатасына, т.с.с орындарға барып үйренген оқушылардың жұмыстары да қызықты және танымды болды.
Білім бұлағына жетелер «Bookkrossing» алаңына білім беру ұйымдарындағы кітап оқуды насихаттау бойынша жұмыстары қойылды.
Көркем әдебиеттердің оқылымнан шығып қалмай, өз оқырманын табуына ықпал ету, тұрғындардың кітап оқуға деген сүйіспеншілігін арттыру басты қағидасы болып табылатын алаң жұмысы өз әсемдігімен, ерекшелігімен тыңдаушыларын тәнті етті.
Сонымен бірге «Туған елге тағзым» өлкетану бағыты бойынша тарихи орындар реконструкциясының көрмесі де мазмұны мен мағынасы жағынан өте әсерлі болы. «Туған елге тағзым» жобасы алаңына оқушылардың өлкетану бағыты бойынша зерттеу және жобалық жұмыстарының қорытындылары қойылды. Бұл көрмеде «Жошы хан мазары», «Отырардың күйреуі», «Ұлытау», «Ұлы даланың жеті қыры», «Алтын адам», «Сақ қорғандарының алтындары», «Ежелгі Қазақстан металлургиясы», «Алашахан мавзолейі», «Құнанбай қажы мешіті», «Қарағанды темір жолы», «Қайыңды көлі», «Аңшылық», «Батырдың киімі», «Алтын адам», «Құрт. Алжир тұтқындары қалай тірі қалды?», «Тың игеру», «Қарағанды шахтасы», «Альтернативті энергия көздері» атты оқушылардың қолынан жасалған 22 жұмыс көрермендердің назарына ұсынылды.
«Робототехника және Stem» жобасы да тартымды,әсерлі және алған идеямыз көп болды. «100 күйдің тарихы» жобасы аясында ойналған қазақ күйлері шара бойы тыңдаушы қонақтарымыздың көңілінен шықты. Каратэ Киокушинкай әдісімен өз өнерлерін қаламыздың жас өнерпаздары көрсетті.
Көп жиылса көл демекші, бірігіп атқарған жұмысымыз өзімізге де ұнады. Саусақ бірікпей, ине илікпейді. Еңбегіміз жана берсін!
