21 ақпан 2012 жылы М. Жұмабаев атындағы №39 гимназияда мектеп директорларына арналған ашық есік күні болып өтті. Ашық есік күні қала мектептерімен тәжірибе алмасу мақсатында ұйымдастырылды. Гимназия мақсаты: Тұлғаны интелектуалды дамыту және жас ерекшеліктеріне сәйкес тілдік құзыреттіліктерін қалыптастыру, білім, білік дағдыларын игеруге жағдай жасау.
Ашық есік күніне келген қонақтар «Қазақтың ұлттық нақыштары» көрмесі мектеп мұражайында және ақпараттандыру орталығы мен мектептің оқу бөлмелерінде болды. Ашық есік күнінің алғашқы сөзін ҚББ –нің бастығының орынбасары Кенешова Р.А. алып бүгінгі күн мақсатымен таныстырып өтті. Гимназия директоры Базыл Ж.С. «Гимназияның оқу -тәрбие үрдісін ұйымдастырудың ғылыми –практикалық негіздері» тақырыбында баяндама жасады. Бейіндік мектеп құру жолындағы әлеуметтік серіктестік жайында Е.А. Букетов атындағы ҚарМУ –дың тарих ғылымдарының кандидаты, доцент Бейсенбекова Н.А., ҚарМТУ-нің инновациялық және оқу- әдістемелік жұмысы жөніндегі проректоры Исагулов А.З. сөз алып, пікірлерін ортаға салды, алдағы уақытта гимназиямен тығыз байланыс жасап, педагогикалық ынтымақтастықты кеңінен дамытуды тілге тиек етті. Директордың оқу ісі жөніндегі орынбасары Изтулеуова С.Д. «Жаңаша оқыту арқылы білім сапасын жоғарылату» , ақпараттандыру жөніндегі орынбасар З.Т. Жапелова «E-learning электронды оқыту жүйесін енгізу арқылы педагог құзыреттілігін дамыту», тәрбие ісі жөніндегі орынбасары Оспанова Қ.Д. «Жеке тұлғаның жан – жақты жетілуі – тәрбие негізі » тақырыптарында мазмұнды баяндамалар жасады.Тоғызқұмалақ ойынан республикалық жарыстың жүлдегері, ҚР спорт шеберлігіне үміткер Еленбаев Болатхан және «Зерде» оқушылардың зерттеу жұмыстары мен шығармашылық жобалардың VII республикалық сайысында ІІ орын иегері Жанғазиев Елнар жобаларын қорғады.
Ашық есік күнінің соңында оқушылар шығармашылығынан «Ұлттың ұлылығы – рухты ұрпағында» тақырыбында бағдарлама ұсынылды. Онда «Шолпан» үлгілі би ансамблінің орындауында «Іңкәр сезім», «Сұлу сарын» билері, облыстық Мұқағали байқауының жүлдегері Қазбек Мейірғазы, Мағжан оқуларының жүлдегері Есниязов Нұржан, Қасым оқуларының жүлдегері Бейсенбин Ернат орындауларында М. Шахановтың «Қайғымен бетпе -бет» және М.Мақатаевтың «Жоқ, дәрігер» өлеңіне шағын көріністер көрсетілді. Гимназия домбырашылары Мұстафин Даулет, Сарсенов Пангерей, Қасым Мәдидің орындауында күйлер тыңдалып, ақын жанды оқушылар Петропавл қаласында өткен Мағжан оқуының жүлдегері Ғалым Арғын мен Есниязов Нұржан, Абай – Шәкәрім оқуының жүлдегері Өкенова Гұлнүр өз шығармашылықтарынан өлең оқыды. Республикалық «Әнші балапан» байқауының лауреаты Кеңесбек Ботакөздің орындауында «Қазақ елі» әні орындалды.
Ашық есік күнінің соңын ҚББ –нің бастығының орынбасары Кенешова Р.А.мен қалалық әдістемелік кабинеттің меңгерушісі Головина Н.В. және келген мектеп директорлары қорытындылап, жақсы ықыластарын білдірді.
Байланыс телефондары
