Қарағанды қаласының білім бөлімі Қазақстан Республикасының Ұлттық Ұланы 52859 Әскери бөлімімен бірлесіп 2016 жылдың 6 мамыр күні Отан қорғаушылар күнін және Ұлы Отан соғысы Жеңісінің 71-жылдығын мерекелеу қарсаңында алғашқы рет білім ұйымдарындағы кадет сыныптары оқушыларының бірінші қалалық әскери-патриоттық слетін өткізді.
Аталған ісшара өскелең ұрпақты қазақстандық патриотизм рухында тәрбиелеу, ұрпақ сабақтастығын арттыру, сонымен бірге өскелең ұрпақтың бойында өз Отанына деген сүйіспеншілікті қалыптастыру мақсатында ұйымдастырылды.
Слетке құрметті қонақтар ретінде Ұлы Отан соғысының ардагерлері, Ауған соғысының ардагерлері, Чернобыль ардагерлері облыстық Кеңесінің өкілдері және басқалары шақырылды.
Слет қатысушыларын Ұлы Отан соғысының ардагері Пономаренко Т.В., «Жауынгерлер аналарының Комитеті» Кеңесінің төрайымы Фатеева М.Д., сонымен қатар Қазақстан Республикасының Ұлттық Ұланы 52859 Әскери бөлімінің командирі, полковник Ә. Бүркітбайұлы құттықтады.
Ісшара барысында №35, 58, 77, 91 мектептердің және №4 мектеп-интернаттың кадеттері өз қойылымдарын көрсетті, ал кадет сыныптарына келген оқушылар кадет Антын салтанатты түрде қабылдады.
Әскери бөлімінің басшылығынан №4 мектеп-интернатына кадет сыныптарының ашылуына биылғы оқу жылында 10 жыл толғанына байланысты бағалы сыйлық табыс етілді.
Сонымен бірге, ісшара барысында «Арлан» арнайы жасағының қойылымын слет қатысушылары тамашалады.
Слет соңында кадеттер әскери бөлімінің әскери техникасымен және қарулар көрмесімен танысты.
Қарағанды қаласының білім бөлімі барлық әріптестерді Отан қорғаушылар күнімен және Жеңіс күнімен шын жүректен құттықтайды!
Өскелең ұрпақтың игілігі үшін, еліміздің болашағы үшін атқарып жатқан еңбектеріңіз табысты болсын! Отанымыз – Қазақстан Республикасы көркейе берсін!
