Наурыз мейрамы қарсаңында Қарағанды қаласының білім бөлімімен 2016 жылғы 16 наурызында №76 орта мектепте «Тәуелсіздігім-мақтанышым!» атты Қазақстан Республикасы Тәуелсіздігінің 25-жылдығына арналған қалалық айтыскерлер сайысы өткізілді.
Сайыс ұлттық мәдени құндылықтарды насихаттау, айтысты халық ауыз поэзиясы формаларының бірі ретінде дәріптеу, дарынды жастарды қолдау, сонымен қатар оқушыларға рухани-адамгершілік және патриоттық тәрбие беру мақсатында ұйымдастырылды.
Оқушылар ән сайысы барысында өз пікірлерін білдіре отырып, домбырадағы тамаша ойнау шеберліктерін көрсетті. Айтыскерлер тәуелсіз жылдар ішіндегі Қазақстанның маңызды жетістіктері туралы айтып, қазақ халқының салт-дәстүрлері, Наурыз мейрамын мерекелеудің маңыздылығын ерекше атап өтті.
Сайыс қорытындысы бойынша жүлделі орындарға ие болғандар: Гран при «Айтыс шебері» - Миров О. (№76 ОМ), 1 орын «Жас ақын» - Рахым Д. (№86 ОМ), 2 орын «Болашақ ақын» - Жомарт Ж. (№65 ОМ), 3 орын «Талапкер ақын» - Кулманов А. (№34 ОМ). Сонымен қатар, жеке номинацияларда жеңімпаздар аталғандар: «Көрермендер көзайымы» - Евилхан А. (№36 ОМ), Амантаева М. (№22 мектеп-интернат); «Домбырада ойнау шеберлігі» - Қонысбек Е. (№12 ОМ); «Сахна мәдениетін ұстау шеберлігі» - Амантаев А. (№54 ОМ).
Қарағанды қаласының білім бөлімі барлық әріптестерді көктемнің жарқын мерекесі Наурыз мейрамымен шын жүректен құттықтайды!
Жаңару мен жасару күні баршамызға бақ-береке, ырыс-ынтымақ әкелсін! Әр жанұяда құт-береке және молшылық болсын! Тәуелсіз Отанымыз - Қазақстан Республикасы көркейе берсін!
