2015-2016 оқу жылында қала мектептерінде 11 сыныпта 1769 оқушы білім алуда, алдын-ала жасалған есеп бойынша оның 80-82%-ы ҰБТ-ге қатысады. «Алтын белгіге» және үздік аттестатқа үміткерлер саны – 56.
ҰБТ-ге дайындық мақсатында тестілеу орталықтары – Қарағанды мемлекеттік университеті мен Қарағанды экономикалық университетінде 6 ақпан күні сынақ тестілеу өткізіліп, оған 37 мектеп қатысты. Тестілеу өткізу ҰБТ өткізу жағдайына барынша жақын болды: оқушылар металл іздегіш жақтаулардан өткізіліп, ұялы телефон байланысын бәсеңдеткіштер қосылып, әр аудиторияда университет ұстаздары кезекшілік етті.
Жақсы нәтиже көрсеткен мектептер: № 93 гимназия – 96 балл, №92 гимназия – 92,8 балл, № 97 гимназия – 92,1 балл, № 101 МЛ – 84,3 балл, № 1 гимназия – 83,7 балл, № 66 ОМ – 81,7 балл. Жалпы қала бойынша орташа балл – 72,3.
Қазақстанда ҰБТ 2004 жылдан бастап өткізіліп келеді. Алғашқы ұлттық бірыңғай тестілеу көрсеткіші 56 балл болса, 2015 жылы бұл көрсеткіш 82,6 балға дейін көтерілді. Ең жоғарғы көрсеткішті 2011 жылғы түлектер көрсеткен, ол жылы орташа қалалық көрсеткіш 83,5 балл болған. Қала бойынша ең жоғарғы көрсеткіш – 125 балға 2010 жылы № 38 гимназия түлегі Митько Екатерина қол жеткізген.
ҰБТ өткізу форматы 2016 жылы өзгермейді: түлектер 4 міндетті (қазақ тілі, орыс тілі, математика, Қазақстан тарихы) және 1 таңдау бойынша пәндерден тест тапсырады. Тестілеу уақыты – 3,5 сағат.
