Ұстаздар күні!

Құрметті Ұстаздар!

Барлық уақытта да ерекше сағынышпен және құрметпен еске алатын мамандықтар бар. Педагог - Ұстаз – солардың бірі болып табылады.

Ұстаз - келер күннің ұстасы. Балалардың қалыптасып келе жатқан дүниетанымының, өмірге деген көзқарасының иесі. Біздердің бүгінгі болмысымыз әліппені жаттатқызып, қолға қалам ұстатқан кешегі ұстаздарымыздың еңбегі. Ендеше, ұрпағымыздың ертең қандай адам болып өсетіні - мұғалімдердің бүгінгі еңбегінің жемісі болмақ.

Шәкірттерін білім нәрімен сусындатып, тәлім-тәрбие беру, жақсы қасиеттерді бойына дарытып, адамгершілік рухта бағыт-бағдар беруде ұстаздың еңбегі зор. Сондықтан да ол әрдайым қасиетті тұлға ретінде ерекшеленеді. Мұғалімнен өнеге-білім алып, өмір теңізіне құлаш ұрған кез келген шəкірт ұстазымен мақтанады.Олай болса, мұғалім бақыты – шәкірт құрметі. Ұрпақ тәрбиесі – ұстазға байланысты. “Ұяда не көрсең, ұшқанда соны ілерсің” дегендей өнегелі ұстаздан жақсы шәкірт шығатыны сөзсіз.Ұстаз – ұлағатты есім. «Мектептің жүрегі», «Бала жанының бағбаны»… Иə, бұл мектеп мұғалімі — ұстазға арналған теңеулер. Мұндай мадақтауларды жалғастыра берсек, даналық сөздер тізбегі шексіздікке ұласады. Білім көшін жылжытып келе жатқан ұстаздар қауымына құрмет арта бермек!

Құрметті  әріптестер!

Мерейлі мерекеде дендеріңізге саулық, амандық, істеріңізге сəттілік тілеймін. Сіздерді кәсіби мерекелеріңізбен шын жүректен құттықтаймын!

Қарағанды қаласы білім бөлімінің бастығы

Д.Ш.Жекебаев.