Қарағанды қаласы әкімдігінің бастамасымен 2016 жылдың 28 қаңтарында №62 орта мектебінде оқушылар арасында құқық бұзушылықты, оның ішінде кәмелетке толмағандар арасында жыныстық тиіспеушіліктің алдын алу мәселелері жөнінде кеңейтілген ведомствоаралық мәжіліс өткізілді.
Мәжіліс жұмысына Қарағанды қаласы әкімінің орынбасары И.Ю. Любарская, Қарағанды қаласы білім бөлімінің басшылығы мен мамандары, жаңадан құрылған Қарағанды қаласының ІІБ жергілікті полиция қызметінің басшылығы, сонымен қатар білім беру ұйымдарының директорлары және тәрбие ісі жөніндегі орынбасарлары, полиция бөлімшелерінің инспекторлары қатысты.
Мәжіліске қатысқандардың назарына оқушылардың арасында құқық бұзушылықтың алдын алу бойынша қалада атқарылып жатқан жұмысы және оның 2015 жылындағы қорытындысы туралы баяндамалар тыңдалып, кәмелет жасқа толмағандар арасында құқық бұзушылықтың алдын алу мәселелері жөнінде ведомствоаралық қарым-қатынасты арттыру бойынша негізгі міндеттер талқыланды.
Сонымен қатар, мәжілістің жұмысына «Озарение» қоғамдық бірлестігінің президенті Т.И. Савицкая қатысып, өз баяндамасында медиация институтының ерекшеліктері және еңбек ұжымдарында жанжал жағдайларды оң шешу бойынша негізгі шаралар туралы ақпарат берді.
Мәжілістің жұмысын білім ұйымдарында эпидемияға қарсы ісшаралар туралы ақпаратпен Қарағанды облысы денсаулық сақтау Басқармасы, күшке енген Қазақстан Республикасының «Ақпаратқа қол жеткізу туралы»Заңының негізгі нормаларын түсіндіру жөнінде Қарағанды облысы бойынша Қазақстан Республикасының Бас прокуратурасы жанындағы құқықтық статистика және арнайы есептер комитетінің Басқармасы, сонымен бірге мемлекеттік істер жөніндегі Департаментінің жемқорлықтың алдын алу бойынша Басқармасы өкілдерінің баяндамалары жалғастырды.
Мәжілістің қорытындысы бойынша біріккен жұмыстың барлық бағыттары бойынша қарым-қатынасты одан әрі арттыру жөнінде шаралар анықталды.
