Жаңа оқу жылының алдында дәстүрлі түрде білім беру жүйесі педагогикалық қызметкерлерінің тамыз мәжілісі өткізіледі. Бұл Қазақстан Республикасының білім беру жүйесін жаңғыртудағы мемлекеттік саясаттың басым бағыттарын іске асыру үшін берілетін бастама.
2015 жылғы 14 тамызда Қарағанды қаласында «Білім беру мазмұнын жаңарту: болашаққа бағдар» тақырыбында тамыз мәжілісі өтті. Талқыланатын негізгі бағыттар Қазақстан Республикасының білім мазмұнын жаңарту, оқыту және тәрбие берудегі жаңашыл көзқарастар, білім сапасын арттыру және оқушылардың функционалдық сауаттылығын дамыту, «Мәңгілік Ел» атты жалпыұлттық идеяны өмірге ендіру арқылы қазақстандық патриотизмді тәрбиелеу мәселелері және т.б. болды.
Қарағанды қаласы әкімдігінің (Бейбітшілік гүлзары, 39 үй) мәжіліс залында сағат 9-30 да өткен пленарлық отырыста модератор - қала әкімі Нұрлан Ерікбайұлы Әубәкіров қатысушылардың назарын қаланың білім беру жүйесін жаңартудағы өзекті мәселелерге аударды, өткен оқу жылының кейбір мәселелерін қорытындылады.
Мәжілістің құрметті қонағы Республикалық оқу Ассоциациясының атқарушы директоры Зейнегүл Копбаева; «Өрлеу» БАҰО АҚ филиалының директоры Саулеш Муканова, Қарағанды қаласы кәсіпкерлер Палатасы филиалының директоры Дияр Бақытұлы Ақпаров, сондай-ақ білім беру ұйымдарының басшылары, педагогикалық еңбектің ардагерлері, кәсіподақ ұйымдарының өкілдері және т.б. болды.
Мектеп, мектептен тыс ұйымдар мұғалімдері, балабақшалар тәрбиешілері үшін секциялық отырыстар күннің екінші жартысында қаланың 21 білім ұйымдарында өтті. Мұнда оқу пәндерін оқытуды жетілдіру бойынша практикалық қадамдар, үздік алғы педагогикалық тәжірибе, өскелең ұрпақты оқыту мен тәрбиелеудегі өзекті мәселелер талқыланды.
