Қазақстан Республикасының Президенті өзінің 2011 жылғы 28 қаңтардағы «Болашақтың іргесін бірге қалаймыз!» аттыҚазақстан халқына Жолдауында: «Сапалы білім беру Қазақстанның индустриалдық-инновациялық дамуының негізі болуы тиіс», - деп атап өтті. Бұл маңызды мәселені түйсіну Қазақстан Республикасы Президентінің 2011 жылғы 7 желтоқсандағы № 1118 Жарлығымен бекітілген Қазақстан Республикасында білім беруді дамытудың 2011-2020 жылдарға арналған мемлекеттік бағдарламасында айқын көрініс тапты.
Бүгінгі қазақстандық білім беру жүйесі өзінің жаңғыру бағытына сәйкес оқу-тәрбие процесін ұйымдастырудың жас ұрпақты ақпараттық технологиялар, жедел дамушы ғылыми экономика, азаматтық қоғам, демократиялық мемлекет, индустрияландырудан кейінгі өркениет жағдайында өмір сүруге дайындауға ықпал ететін жаңа үлгілерін іздестіру үстінде.
Бұл міндеттерді жүзеге асыру үшін елімізде педагогикалық және ата-ана қоғамдастықтары, бизнестік құрылымдар мен үкіметтік емес ұйымдар арасында байланыс орнату, олардың өзара белсенді ынтымақтастығын жандандыру, білім беру жүйесін демократияны нығайту мен азаматтық қоғам қалыптастыру негізіне айналдыру мәселелеріне қызмет ететін ауқымды алаңша құру қажеттігі туындап отыр.
Сондықтан биылғы білім беру қызметкерлерінің тамыз кеңестері«Отбасы, мектеп және қоғамның игілікті болашақ жолындағы өзара ынтымақтастығы» тақырыбын, Елбасының «Болашақтың іргесін бірге қалаймыз!» Қазақстан халқына Жолдауында белгіленген міндеттерді, Қазақстан Республикасы Үкіметінің, Білім және ғылым министрлігінің құқықтық-нормативтік құжаттарындағы басым идеяларды талқылауға ықпал етуі тиіс.
Байланыс телефондары
