Балалар жол-көлік жарақаттануының алдын алу мақсатында жыл сайын Қарағанды қаласының білім бөлімі Қарағанды қаласының ІІБ әкімшілік полиция бөлімімен бірлесіп мектептердегі жол қозғалысы жас инспекторларының арасында қалалық байқау ұйымдастырады.
Аяқталған оқу жылында қалалық байқауының қорытындысы бойынша №101 мектеп-лицей және №95 мектеп-гимназия командалары жеңімпаз атанды.
Ағымдағы жылы мамыр айында өткізілген жас инспекторлардың облыстық байқауында №101 мектеп-лицей 1 орынға ие болып, 23-30 маусым аралығында Өскемен қаласында өткен Г. Байтасов атындағы XIV Республикалық слетте Қарағанды облысының намысын қорғады. Сонымен қатар, Республикалық слетке Тәджікістан және Ресей Федерациясынан командалар қатысты.
Республикалық слетте №101 мектеп-лицейдің жас инспекторлары жақсы дайындық деңгейлерін көрсетіп, үгітбригада, жол ережелерінің білімпаздары, саптық байқау, сонымен қатар бейнероликтер байқаулары бойынша 4 жүлделі орынға қол жеткізді. Республикалық сайыстың қорытындысы бойынша №101 мектеп-лицей 3 жалпыкомандалық орынға ие болды!
Қарағанды қаласының білім бөлімі балаларды және команда жетекшісі А.В. Ткаченконы республикалық слетке табысты қатысуымен құттықтайды және жаңа жеңістер мен жетістіктер тілейді!
