Жеңістерімізді саған арнаймыз, Қарағанды!

Қарағанды қаласы білім бөлімінің бастамасымен балалар мен жеткіншектер Сарайында 2014 жылғы 16 қаңтарда оқушылардың Республикалық олимпиадасының қалалық кезеңінің 198 жеңімпаздары мен жүлдегерлерін және оларды дайындаған мұғалімдерді салтанатты марапаттау рәсімі өткізілді. Аталған ісшара Қарағанды қаласының 80 жылдығына арналды!
Қарағанды қаласы әкімінің орынбасары И.Ю. Любарская мерекеге жиналғандарды құттықтап, әр деңгейде өтіп жатқан пәндік олимпиадаларда бірнеше жылдар бойы жоғары нәтиже көрсеткен оқушылардың ата-аналарын Қарағанды қаласы әкімдігінің Алғыс хатымен марапаттады.
Оқушылар мен мұғалімдерді құттықтау үшін ісшараға өз жетістіктерімен Қарағанды қаласының атын шығарған түлектер жиналды. Олардың ішінде: 2010 жылы ҰБТ қорытындысы бойынша 125 балл алған Митько Екатерина (№38 гимназия), «Жыл оқушысы-2012» атағының иегері, ғылыми жобалар бойынша республикалық сайыстардың жеңімпазы Сероухова Диана (№95 мектеп-гимназия); «Жыл оқушысы-2013» атағының иегері  Саматов Нурбол (№91 ОМ); 2013 жылы Қазақстан тарихы бойынша оқушылардың Республикалық олимпиадасының жеңімпазы Пичугина Дарья (№1 гимназия). Олардың барлығы қазіргі уақытта Қазақстан Республикасындағы және шетелдердегі жоғары оқу орындарының студенттері болып табылады.
Қарағанды қаласы білім бөлімінің басшысы Д.Ш. Жекебаев қалалық олимпиада жеңімпаздарын құттықтап: «Сіздер біздің мақтанышымыз! Сіздер өздеріңіздің және мектептеріңіздің абыройын жоғарылаттыңыздар! Өз білімдеріңіздің тереңдігін, ойлау қабілеттеріңіздің өткірлігін, ал ең бастысы үздік болу талпыныстарыңызды білдіре білдіңіздер», деп ерекше атап өтті.
Биылғы жылы  № 93, 97, 38, 3, №2 лицей командалары үздік олимпиада командалары болып атанды. Осы білім ұйымдары қалалық олимпиадалардың қорытындысы бойынша бес жыл бойы көш басында келеді. Аталған инновациялық білім ұйымдарымен бірге қалалық олимпиада да жалпы білім беретін  № 6, 41, 68, 76, 77 мектептері де жоғары нәтижеге жетті. Үздік мектептер Қарағанды қаласы білім бөлімінің Дипломымен марапатталды.
Ісшара барысында өз өнерлерімен №39 гимназияның «Шолпан» үлгілі би ансамблі,  балалар мен жеткіншектер Сарайының «Ритмы» үлгілі би ансамблі,  «Бозторгай» вокал студиясы, «Куба» брейк-данс мектебінің тәрбиенушілері, №2 өнер мектебінің дуэті, республикалық шығармашылық байқаулардың жеңімпазы Мауиянов Медет және Тәттімбет атындағы Қарағанды өнер колледжінің «Ізбасар» тобы бөлісіп, мерекеге ерекше әсер берді.