Балалар мен жеткіншектер Сарайының 70 - жылдығы аясында кеншілер мәдениет Сарайында 2012 жылғы 08 қарашада «Дворец приглашает друзей!» атты мерекелік Гала-концерт өтті.
Қарағандылық балалар мен жеткіншектер Сарайы қазіргі таңда балалардың бос уақытты, әдістемелік-ақпараттық жұмысты жүзеге асыратын, әртүрлі формалар мен бағыттар арқылы балалар мен жеткіншектерге сапалы қосымша білім алуға кең мүмкіндіктер беретін көп салалы, кешенді мектептен тыс ұйым болып табылады. Жыл сайын 2 мыңнан астам кішкентай қарағандылықтар үшін өз есігін ашып жүрген балалар Сарайы көптеген республикалық байқаулардың жеңімпазы болып, республикамыздың қосымша білім беру жүйесінде маңызды орын алуда.
Балалар Сарайының шығармашылық ұжымдары, оның ішінде «Искорка», «Ритмы», «Волшебная страна» би ансамбльдері, «Бозторғай» вокалды студиясы және басқалары - халықаралық, республикалық, облыстық, қалалық конкурстардың және фестивальдардың жеңімпаздары мен жүлдегерлері. Балалар Сарайының шығармашылық ұжымын мерекемен Қарағанды қаласы әкімінің орынбасары И.Ю. Любарская, мемлекеттік ұйымдардың өкілдері, әлеуметтік серіктестер, ардагерлер мен түлектер құттықтады.
Қарағанды қаласының білім бөлімі балалар мен жеткіншектер Сарайын 70-жылдық мерейтойымен шын жүректен құттықтайды! Балалар Сарайының тату ұжымына таусылмас қуат, шығармашылық табыс пен жаңа жетістіктер тілейміз!
