Астанада «Болашақ бүгіннен басталады: EXPO-2017 Астана» атты әдістемелік құралдың тұсауы кесілді. Аталған әдістемелік құрал педагогтарға арналған қосымша оқу құралы іспетті. Оқулық негізгі пән ретінде сабақ кестесіне енгізілмегенімен, 1000 данасы жарық көріп, Астана мектептеріне таратылса, электронды нұсқасы еліміздің түкпір-түкпіріне жіберілетін болады. Осылайша, оқулықты сынып сағаты, конференция мен дөңгелек үстелдерде пайдалану арқылы балалардың EXPO туралы танымын арттырып, оның даму кезеңдері жайлы кеңінен ақпарат алуына мүмкіндік береді. Айта кету керек, әдістемелік құралға 4 оқушының жобасы енген. 

Ботагөз Қайыпова, ҚР Тұңғыш Президенті мұражайы директорының орынбасары:

«Құралдың ішінде Астана қаласы мұғалімдерінің ғана емес, «Назарбаев» зияткерлік мектептерінің арнайы сабақтарының сценарийлері енгізілген. Сонымен қатар, балабақша, мектеп, жасөспірімдер мен студенттерге арналған EXPO тарихы, мақсат-міндеттері кеңінен жария етіліп, 2017 жылға дайындық жұмыстары көрсетілген».

**************************

«Астана «ЭКСПО-2017» көрмесінің ашылуына санаулы күндер қалды. Таяуда елордамызға әлемнің түпкір-түпкірінен туристер ағылады. Ел басқарған азаматтар халықаралық шараны абыроймен атқаруға барын салып жатыр. Мемлекет басшысы Нұрсұлтан Назарбаев бүгін арнайы уақыт бөліп, «ЭКСПО» қалашығын аралап көрді.