26 қараша күні 11 «Б» сынып оқушыларымен «1 желтоқсан –Қазақстан Республикасының Тұңғыш Президенті күні»мерекесіне арналған сынып сағаты өткізілді.
Сынып сағатының тақырыбы:«Мақтанышым Елбасым».
Баршаңызды егемендігіміз мен елдігіміздің мерейлі мерекесі – Қазақстан Республикасы Тұңғыш Президенті күнімен құттықтауға рұқсат етіңіздер! – деп өз баяндамамдаТұңғыш Президент бастамасымен тәуелсіздік жылдарында қол жеткен іргелі табыстарға кеңінен тоқталып кеттім.
Қазақстан халқы 1 желтоқсан күні еліміз үшін елеулі оқиға - алғаш рет Тұңғыш Президент күнін атап өтеді. Алайда кейбіреулерді бұл мерекенің шығу тарихы ойландырары анық. Айталық, былтыр ел Парламенті 1991 жылғы 1 желтоқсанда өткен Тұңғыш Президент сайлауына қатысты осындай шешім қабылдаған болатын. Мұның себебі неде? Себебі тәуелсіз Қазақстанның іргетасын қалап, шекарасын шегелеп, болашаққа бағыт-бағдар берген Тұңғыш Президенттің халық алдындағы еңбегі ұшан-теңіз.
Сәл тарихқа шегініс жасар болсақ, 1991 жылғы 1 желтоқсанда, алғаш рет жалпыхалықтық сайлау өтіп, егемен Қазақстанның негізін салушы - Нұрсұлтан Назарбаев тұңғыш рет Президент болып сайланды. Сайлауға қатысқандардың 98,78%-ы жақтап дауыс берді. Бұл жаңа мемлекет қалыптасуының өтпелі кезеңінде сенімді басшыға өз тағдырын тапсырған Қазақстан халқының жауапты таңдауы еді. Шын мәнінде, Елбасы Нұрсұлтан Назарбаевтың салиқалы саясатының арқасында тәуелсіз Қазақ елі қалыптасып, тарихымыз түгенделіп, тіліміз, дініміз және діліміз қайта оралып, мемлекетіміздің ұлттық рәміздері қабылданды. Қазақстанның шынайы егемендігін қамтамасыз еткен маңызды мемлекеттік актілерге қол қойылды. Мәселен,1991 жылдың 29 тамызында Нұрсұлтан Назарбаевтың Семей ядролық полигонын жабу туралы Жарлығы шықты. Сондай-ақ 1991 жылдың 25 қазанында Президенттің Жарлықтарымен Қауіпсіздік кеңесі және мемлекеттік қорғаныс комитеті құрылды. Оған дейін Президент «Одаққа бағынған мемлекеттік кәсіпорындар мен ұйымдарды ҚКСР иелігіне ауыстыру туралы» және «ҚКСР-ның алмас және алтын қорын құру туралы» Жарлық шығарды. Қысқасы, Қазақстан Республикасының мемлекеттік тәуелсіздігінің іргетасы осылай қаланды.
Н.Назарбаев армандаған болашақ Қазақстан қандай? - Ол - ана тілінде еркін сөйлейтін, орыс тілін игерген, ағылшын тілін меңгерген ұрпақтың Қазақстаны. - Ұлты тату, этникалық толерантты - Қазақстан! - Кез келген Қазақстан азаматы кез келген әлем еліне барып жұмыс істей алатын, таласқа жарайтын ұрпақ тәрбиелеген - Қазақстан! - Индустриялық-инновациясы өркендеген - Қазақстан! - Терезесі тең, керегесі кең - өркениетті Қазақстан! - Ауылы мен қаласы қатар өскен - қуатты Қазақстан! Бүгінде Қазақстан кемел ел, ынтымағы жарасқан мемлекетке айналды. Тарихта жеке адамның рөлін ешкім жоққа шығара алмайды. Н.Назарбаев уақытын безбендеп, заманын таныған, болашақты болжаған ірі саясаткер. Елдің басшысы қандай болса, халқы сондай. Н.Назарбаев - елі еріне, ері еліне сенген ұлы тұлға! деп өз баяндамамды қорытындыладым.
Сынып сағаты мультимедиа кабинетінде слайдтарымен өткізілді. Оқушылар сынып сағатында тұнғыш Президенттің өмірбаяны, ғылыми еңбектері, қызмет жолдары, кітаптары, өлеңдері, дәйек сөздері, отбасылық жағдайы, ҚР ашылған Президент мектептерімен, университеттері туралы әңгіме қозғады. Оқушылар өте белсенділікпен қатысты. Сынып сағатының соңында әрбір оқушы Елбасына жазған өздерінің құттықтау хаттарын оқыды.
Сынып жетекшісі Сарсенбаева Толқын Орынбайқызы
