Ақпан айының 24-і күні қалалық білім бөлімі ӘК-нің жылдық жоспарына сәйкес жалпы білім беретін №77 мектеп-балабақша кешенінің базасында қазақ тілі мен әдебиеті пәнінің мұғалімдері арасында дәстүрлі ІХ қалалық «Қанипа Омарғалиқызы Бітібаеваның технологияларына құрылған панорамалық сабақтар» байқауы өтті.  

Байқаудың негізгі мақсаты - жаңашыл педагогтердің идеясы негізінде ұсынған Қ.Бітібаеваның  технологияларын тиімді пайдалану, ұстаздардың әдістемелік шеберліктерін шыңдап, іс-тәжіриесімен бөлісу. Байқауға қатысушы  ұстаздарды мектеп директоры З.Р.Жантыбаева, қалалық білім бөлімінің әдіскері Г.Б.Жаркеева құттықтап сөз сөйледі. Байқау екі кезеңде өтті. Бірінші кезеңнің іріктеу сынынан өткен 9 мұғалім  алдымен өздерін таныстырып өтті де,  2-кезеңнің шарттарын орындады. Онда мұғалімдер өздерінің ұсынған панорамалық сабақтарын қорғады, әділқазылар алқасының тарапынан қойылған сұрақтарға ұтқыр да ұтымды жауап берді және №77 мектеп-балабақша кешенінің мұғалімдері мен оқушылары дайындаған педагогикалық жағдаяттардан шығудың жолдарын айтып, ой бөлісті. Осы байқауда топты жарып оза шапқан ұстаздар: №6 орта мектептің мұғалімі Шунеева Аширкул Егембердикызы І орын, №61 орта мектептің мұғалімі Көки Жұлдыз ІІ орын, №36 орта мектептің мұғалімі Жагыпарова Гульсана ІІІ орын. «Жүзден жүйрік» номинациясын №41 орта мектеп мұғалімі, жас маман Тусупбекова Ж. «Зерттеуші ұстаз» номинациясын №39 гимназия мұғалімі Баспакова Р. «Жаңашыл ұстаз» номинациясын №8 НМ мұғалімі Макачева Г. иеленді. Дәстүрлі байқау өз дәрежесінде өтіп, көрермендердің көңілінен шықты.  «Өрлеу БАҰО» АҚ филиалы Қарағанды облысы бойынша ПҚ БАИ, аға оқытушы Айткенова Мөлдір Болатовна байқау соңында ұстаздарға рақмет айтып, ұлы тұлға Қ.О.Бітібаеваның атын асқақтатып жүрген қазақ тілі, әдебиеті мұғалімдерінің еңбегіне толағай табыстар тіледі. 

Жүлделі орын алған ұстаздарымызды құттықтаймыз!