Қыркүйек айы өңіріміздің қазақ тілі мен әдебиеті пәндерінің мұғалімдері үшін жаңалықтар мен іс-шараларға толы болды. Тамыз конференциясы жаңа талаптарды меңгеруге бағыт берсе, қыркүйектің 4-і күні № 4 МИ қабырғасында өткен семинар білім берудің жаңа мазмұнын ашып көрсетті. Осы білім мекемесінің қазақ тілі мен әдебиеті пәндерінің мұғалімі А.Ө.Ташпулатова 2013-2014 оқу жылында енгізіліп отырған жаңа нормативті құжаттардың (мемлекеттік стандарт, бағдарлама, ӘНХ) мазмұнын, құрылымын салыстыру арқылы мұғалімдерге міндеттелген талаптарды жұмыс жазықтығына алып шықты. Бұл семинарға қатысушылар өткізілген тренинг және сұхбаттасу арқылы өздерін толғандырып жүрген сұрақтарына жауап алды. 

18 қыркүйек күні № 59 мектепке қаламыздың орыс мектептеріндегі қазақ тілі мен әдебиеті пәнінен сабақ беретін жас мамандары «Мемлекеттік тілді оқытуда ауызша және жазбаша сөйлеу арқылы оқушының сөздік қорын молайту» тақырыбындағы семинарға жиналды. Семинар жоспарында көрсетілген шаралар тек жас мамандар ғана емес тәжірибелі мұғалімдердің өзіне сөздік қорды дамытудың жаңа әдіс-тәсілдерін ашып берді. № 48 ОМ мұғалімі Ә.Г.Исагулова өз баяндамасында интерактивті әдістерді (сұрақ-жауап, әңгімелесу) қолдана отырып сөздік қорды дамытудың тиімділігін өз тәжірибесінің қорытындысы негізінде көрсетіп берді. Семинарға қатысушылар Г.Қ.Сейілбектің 6 сыныпта өткізген «Менің отбасым» тақырыбындағы сабағына ризашылығын білдірді. М.Р.Досымжанова 8 сыныпта «Әдептілік – әр адамның бет бейнесі» тақырыбында ашық сабақ берсе, Г.Аширбекова, Ж.Мұса, Б.Көшербаева сияқты мұғалімдер ұжымы «Мемлекеттік тіл – менің тілім» тақырыбында сыныптан тыс ісшара өткізді. Семинар жұмысына қанағаттанған қатысушылар жас мамандарға арналған шаралардың санын көбейтуге ұсыныстар жасап, ұйымдастырушыларға алғыстарын білдірді.

Әдістемелік ісшаралармен қатар қазақ тілі мұғалімдері сыныптан тыс мерекелер де өткізуге атсалысады. ҚР халықтарының тілдері күніне арналған  фестиваль осының дәлелі болып табылады. № 15 ОМ қабырғасында өткен бұл фестиваль түрлі ұлт өкілдерінің басын қосып, өнерлерін паш етті. Мектеп ұжымы қала деңгейіндегі ісшараның жоғары деңгейде өтуіне барынша күш салды. Фестивальға қатысушылар мен көрермендер қауымы шара деңгейін өте жоғары деп бағалады.

Келесі жоспарланған шара – қалалық деңгейде 2013 жылдың 25.09. күні өтетін On line сабақ. № 15 мектептің мұғалімі Р.К.Есниязова заман талабына сай техникалық құралдарды қолдана отырып, оқушылардың құзырлылықтарын арттыру жолдарын көрсетеді. Сабақ өтетін электронды адрес – sabak.kz